Huckleberry Finn-en Abenturak (EUS)

Liburuak Huck Finn 13-14 urteko mutil gaztearen abenturak kontatzen dizkigu. Etxetik ihes egin eta almadia batean, beste iheslari batekin batera (Jim esklabo beltzarekin), Mississippi ibaian zehar bidaia luzea egiten du. Mutilak etxetik alde egin nahi du eta beltzak, berriz, estatu libreetara iritsi. Bidean leku askotatik igarotzen dira eta pertsonaia asko ezagutzen dituzte. Guztien aurrean Huckek bere iritzia ematen digu, bera baita liburuaren kontalaria. Bere ikuspegi leial eta zintzoak erakusten dizkigu Ipar Ameriketako gizartearen akatsak, eztabaidak eta gatazkak. Esklabutza bera, adibidez, bere garaiko gizarteak onartzen zuen arren, Huckek bere erabakia hartzen du, eta legearen kontrakoa bazen ere, esklabo beltzari laguntza ematea erabakitzen du. Ipar Ameriketako historia ezagutzeko ezinbesteko liburua da (familien arteko borrokak eta hilketak, herriz herri iruzur egiten dabiltzan pikaroak eta haien kontrako zigorrak, esklabo beltzen egoera...), kontalari tolesgabe batek adierazia.